ლადო კოტეტიშვილს ქართული საზოგადოება იცნობდა როგორც პრაქტიკოს ექიმს, ნევროპათოლოგს, ძველი ქართული კარაბადინების პირველ გამომცემელს, რითაც მან ქართული მედიცინის ისტორიის მეცნიერული კვლევის ფუძემდებლის სახელი დაიმკვიდრა. ეს წოდება დიდმა ივანე ჯავახიშვილმა მიანიჭა მას, როდესაც ლადო კოტეტიშვილმა გამოსცა შუა საუკუნეების სამი უძველესი ძეგლი  „უსწორო კარაბადინი“ (X ს.), „წიგნი სააქიმოი“ (XIII ს.) და „იადიგარ დაუდი“ (XVI ს.) სრული მეცნიერული აპარატით, ვრცელი წინასიტყვაობით, ლექსიკონითა და საძიებლით.

ლადო კოტეტიშვილი, როგორც მწერალი ქართულმა საზოგადოებამ მოგვიანებით გაიცნო, როცა მისი მოთხრობები დაიბეჭდა ჟურნალში „ლიტერატურული პალიტრა“ 2012-13 წლებში. ჟურნალის რედაქტორის ბატონ ზაალ ჩხეიძისათვის, როგორც თავად აღნიშნავს, ეს იყო ნამდვილი აღმოჩენა.