ანთროპოლოგ დევიდ გრებერს, ლონდონის ეკონომიკის სკოლის პროფესორს, უწოდებენ რადიკალ ანარქისტს, რომლისთვისაც სახელმწიფო, როგორც ინსტიტუტი, მავნებლობაა, რადგან იგი ადამიანის თავისუფლებას ჩარჩოში აქცევს, დემოკრატიას ზღვრებს უწესებს, ვინაიდან სახელმწიფოს არსს წარმოადგენს სტრუქტურული ჩაგვრა და დომინანტი კლასის ძალაუფლების უზრუნველყოფა. განსახილველ წიგნში ავტორი მარტივი ენით ახერხებს, სინათლე მოჰფინოს იმ სიმახინჯეებს, რომლებიც დღევანდელი მსოფლიოს პოლიტიკურ და ფინანსურ სისტემას ახასიათებს, ცდილობს, მკითხველს დაწვრილებით გააცნოს დღევანდელი ფინანსური სისტემა, ამასთანავე, ჩამოაყალიბოს „რადიკალური დემოკრატიისათვის“ ბრძოლის ხედვა. ამდენად, გრებერის ეს ნაშრომი წარმოადგენს ზოგადად, დემოკრატიის, სახელმწიფო ინსტიტუტებისა და ამერიკული პოლიტიკური დისკურსის ისტორიის კრიტიკულ ანალიზს, მასთან ერთად კი რადიკალური დემოკრატიისათვის ბრძოლის მეთოდების პრაქტიკულ სახელმძღვანელოს. გრებერის გამოცემები იძლევიან ახლებურ ხედავს, რომელსაც იგი თავად რადიკალური დემოკრატიისათვის ბრძოლას უწოდებს და დარწმუნებულია, რომ ჩვეულებრივ მოქალაქეებსაც შეუძლიათ სამყაროს შეცვლა.